पुणे : महाराष्ट्र राज्य मार्ग परिवहन महामंडळाची जनमानसातील जिव्हाळ्याची ओळख असलेल्या ‘लाल परी’चा ७८ वा वर्धापन दिन कात्रज येथील मोरे बाग बस थांब्यावर उत्साहपूर्ण वातावरणात साजरा करण्यात आला.
एस.टी. महामंडळाचे सेवानिवृत्त कर्मचारी श्री. भागुजी भीमा उर्फ अण्णा बराटे व सेवानिवृत्त वाहक श्री. सुनिल चव्हाण हे गेल्या नऊ वर्षांपासून गुड मॉर्निंग ग्रुप, कात्रज यांच्या सहकार्याने हा उपक्रम सातत्याने राबवत आहेत. यंदाही सोमवार, दि. १ जून २०२६ रोजी अण्णा बराटे यांच्या कुटुंबीयांसह श्री. सुनिल चव्हाण आणि गुड मॉर्निंग ग्रुपच्या सदस्यांनी कार्यक्रमाचे आयोजन केले.
यावेळी एस.टी. महामंडळातील चालक व वाहक यांचा सन्मान करण्यात आला. तसेच ‘लाल परी’चे पूजन करून श्रीफळ अर्पण करण्यात आले. राज्याच्या कानाकोपऱ्यात प्रवाशांना सुरक्षित, विश्वासार्ह आणि परवडणारी सेवा देणाऱ्या एस.टी. महामंडळाबद्दल कृतज्ञता व्यक्त करण्याच्या भावनेतून हा उपक्रम दरवर्षी साजरा केला जातो.
कार्यक्रमास भारती विद्यापीठ अभिमत विद्यापीठाच्या महिला अभियांत्रिकी महाविद्यालय, पुणेचे प्राचार्य डॉ. प्रदीप जाधव यांची प्रमुख उपस्थिती लाभली. याशिवाय गुड मॉर्निंग ग्रुप, कात्रजचे ४० हून अधिक सदस्य, एस.टी. कर्मचारी, चालक-वाहक तसेच नागरिक मोठ्या संख्येने उपस्थित होते.
उपस्थित मान्यवरांनी महाराष्ट्राच्या सामाजिक, शैक्षणिक आणि आर्थिक विकासात महत्त्वपूर्ण योगदान देणाऱ्या एस.टी. महामंडळाच्या कार्याचा गौरव केला आणि ‘लाल परी’च्या उज्ज्वल भविष्यासाठी शुभेच्छा व्यक्त केल्या.
