पुणे : पुणे महानगरपालिका सेवानिवृत्त शिक्षक संघटना, औंध-पाषाण-गोखलेनगर विभागाच्या वतीने शनिवार (दि. ७ मार्च २०२६) रोजी मासिक सभेचे आयोजन करण्यात आले होते. या सभेत प्राचार्य पद्माकर पुंडे यांचा “चला गप्पा मारू या” हा विशेष कार्यक्रम आयोजित करण्यात आला होता.
या कार्यक्रमात प्राचार्य पुंडे यांनी अत्यंत मनोरंजक शैलीत विविध विषयांवर गप्पा मारत उपस्थित शिक्षकांना मार्गदर्शन केले. त्यांनी ज्येष्ठांनी आयुष्यात कार्यमग्न, आनंदी आणि हसतमुख राहावे, मनातील विचार मोकळेपणाने व्यक्त करावेत आणि आयुष्य आनंदाने जगावे, असे मौलिक विचार मांडले.
यावेळी त्यांनी जागतिक ख्यातीचे नाटककार William Shakespeare यांच्या नाटकांतील काही प्रसंग नाट्यमय पद्धतीने सांगत उपस्थितांचे मनोरंजन केले. त्यांच्या विनोदी आणि ओघवत्या शैलीमुळे कार्यक्रमाला विशेष रंगत आली.
या कार्यक्रमाला उपस्थित शिक्षकांकडूनही उत्स्फूर्त प्रतिसाद मिळाला. कार्यक्रमात संघटनेचे अध्यक्ष विठ्ठलराव शेटे, कार्यकारिणी सदस्य तसेच औंध-पाषाण-गोखलेनगर विभागातील अनेक सेवानिवृत्त शिक्षक मोठ्या संख्येने उपस्थित होते. संपूर्ण कार्यक्रम अतिशय आनंददायी वातावरणात पार पडला असून उपस्थितांनी या उपक्रमाचे कौतुक केले.
