पुणे : पुणे महानगरपालिका निवडणुकीसाठी प्रसिद्ध करण्यात आलेल्या प्रारूप मतदार याद्यांमध्ये प्रचंड घोळ करण्यात आला आहे. चक्क अहिल्यानगर, बीड, परभणी जिल्ह्यातील काही नावे या यादीत आहेत. मतदार याद्यां मधील या घोळा बाबत आज पुणे महापालिकेत आम्ही महाविकास आघाडी व मनसे, वंचित बहुजन आघाडी यांच्या वतीने अतिरिक्त महापालिका आयुक्त ओमप्रकाश दिवटे यांची भेट घेऊन या विषयीच्या तक्रारी व हरकती नोंदवल्या.
प्रभाग आठ मधील (औंध- बोपोडी) भागातील तीन हजारांवर मतदार प्रभाग सात मध्ये टाकण्यात आले आहेत. प्रभाग सात मधील नावे १२ क्रमांकाच्या प्रभागात गेली आहेत. तर प्रभाग क्रमांक सात व आठ मधील नावे प्रभाग क्रमांक 9 मध्ये टाकण्यात आले आहेत. लोकसभा निवडणुकीत शहरात एक लाख मतदारांची नावे दुबार होती. महापालिका निवडणुकीत ती साडेतीन लाख झाली आहेत.
महानगरपालिकेच्या याद्यांमध्ये मोठ्या प्रमाणात मतदारांची नावे दुसऱ्या प्रभागात टाकण्यात आली आहेत. प्रभागामध्ये राहणाऱ्या स्थानिक अधिकाऱ्यांना हाताशी धरून ठराविक मतदारांना दुसऱ्या प्रभागात टाकण्याचे तसेच काही परिसरातील इच्छुक उमेदवारांची नावे दुसऱ्या प्रभागात टाकण्याचे प्रकार मतदार याद्यांमध्ये करण्यात आले आहेत. तसेच निवडणूक आयोगाने तक्रार करण्यासाठी फक्त संबंधित मतदारांनीच अर्ज करावा अशी अट घालण्यात आली आहे परंतु मतदारांची माहिती देण्यासाठी पुरेशा यंत्रणा तयार करण्यात आलेल्या नाहीत यामुळे संबंधित मतदारांपर्यंत माहिती पोहोचवली जात नाही.
पुणे महानगरपालिकेच्या निवडणुका लोकशाही पद्धतीने पार पाडण्यासाठी मतदार याद्यांवर काम करणाऱ्या अधिकाऱ्यांची निवडणूक आयोगाने सखोल चौकशी करावी अशी मागणी राजकीय पक्षाच्या कार्यकर्ते व नागरिकांकडून होऊ लागली आहे.मतदार याद्यांमध्ये दुरुस्ती झाल्याशिवाय निवडणूक नको ! अशी मागणी करण्यात आली.
पुणे महानगरपालिका निवडणुकीसाठी मतदारांची प्रभाग निहाय अंतिम ड्राफ्ट यादी काही दिवसांपूर्वी जाहीर झाली. या यादीमध्ये असंख्य चुका असून ३ लाखांपेक्षा जास्त मतदारांची दुबार नोंदणी असल्याची कबुली खुद्द महानगरपालिका आयुक्तांनी दिली आहे. अनेक ठिकाणी मतदारांना गैरसोयीचे दूरच्या भागातील मतदारांची नोंदणी अनेक प्रभागांमध्ये करण्यात आली आहे. पुणे महानगरपालिका प्रशासन सत्ताधारी भाजपच्या प्रभावाखाली काम करत असल्याची शंका सर्व पुणेकरांकडून व्यक्त केली जात आहे.
या ड्राफ्ट यादीवर हरकती नोंदवण्यासाठी केवळ ८ दिवसांचा अवधी देण्यात आला आहे. एक प्रकारे सदोष मतदार यादी पुढे रेटून निवडणुका घेण्याचा हा डाव असल्याची भावना सर्वसामान्य पुणेकर व्यक्त करत आहेत. हीच भावना प्रशासनापर्यंत पोहोचवण्यासाठी आज राष्ट्रवादी काँग्रेस पार्टी शरदचंद्र पवार, अखिल भारतीय राष्ट्रीय काँग्रेस, शिवसेना उद्धव बाळासाहेब ठाकरे, महाराष्ट्र नवनिर्माण सेना, वंचित बहुजन आघाडी, आम आदमी पार्टी, समाजवादी पक्ष यांच्यासह इतरही पक्षांच्या नेत्यांनी संयुक्त शिष्टमंडळाच्या माध्यमातून मनपा अतिरिक्त आयुक्त मंगेश दिवटे यांची भेट घेतली. मतदार यादी मध्ये मोठा घोळ असल्याची बाब स्वतः आयुक्तांनी मान्य केली आहे. या माध्यमातून सदोष पद्धतीने निवडणुका घेऊ नये, आधी मतदार याद्या पूर्णपणे निर्दोष कराव्यात व त्यानंतरच निवडणुका घ्याव्यात अशी मागणी या शिष्टमंडळाने केली आहे.
आमदार बाप्पुसाहेब पठारे, अंकुशआण्णा काकडे, जयदेवराव गायकवाड, रविंद्रअण्णा माळवदकर, प्रशांत जगताप, अश्विनीताई कदम,अरविंद शिंदे, साईनाथ बाबर, संजय मोरे, गजानन थरकुडे, वंचीत चे अरविंद तायडे, बाळासाहेब शिवरकर, बाबु वागसकर, अभय छाजेड, मनोहर जांबूवंत, सचिन दोडके, सुनील माने आदी उपस्थित होते.
