पुणे : एमआयटी आर्ट, डिझाईन अ‍ॅण्ड टेक्नोलॉजी विद्यापीठ (एमआयटी एडीटी), पुणे यांनी आंतरराष्ट्रीय सहकार्याच्या दिशेने एक महत्त्वपूर्ण पाऊल उचलले आहे. विद्यापीठाने जपानमधील जी-प्लेस कॉर्पोरेशन आणि पुण्यातील क्रिस एअरो सर्व्हिसेस प्रा. लि. यांच्यासोबत एक त्रिपक्षीय सामंजस्य करार केला आहे. या कराराअंतर्गत पर्यावरण अभियांत्रिकी क्षेत्रातील एक नविन प्रकल्प राबविण्यात येणार आहे.
या प्रकल्पाअंतर्गत जी-प्लेसने विकसित केलेली ‘डोमेस्टिक मल्टी-रिसायकलर’ (DMR) तंत्रज्ञान प्रणाली – ज्याला ‘जहकासो’ या नावानेही ओळखले जाते – ती एमआयटी एडीटी विद्यापीठाच्या परिसरात पर्यावरणीय परिस्थितीत चाचणीसाठी बसविण्यात येणार आहे.
करार समारंभप्रसंगी विद्यापीठाचे कार्यकारी अध्यक्ष डॉ. मंगेश कराड, प्र-कुलगुरू डॉ. रामचंद्र पुजेरी, अधिष्ठाता डॉ. सुदर्शन सानप तसेच एसओईएसचे संचालक डॉ. वीरेंद्र शेटे उपस्थित होते. क्रिस एअरो सर्व्हिसेसतर्फे व्यवस्थापकीय संचालक श्री. दीपक कपाडिया, त्यांच्या पत्नी आणि पुत्र श्री. राज कपाडिया यांनी सहभाग घेतला.
या सहकार्याचा मुख्य उद्देश म्हणजे डीएमआर प्रणालीद्वारे सांडपाण्याचे शुद्धीकरण करणे आणि ते शेतीसाठी उपयुक्त पोषक पाण्यात रूपांतरित करण्याच्या शक्यता तपासण्याचा आहे. विशेष बाब म्हणजे ही प्रणाली वीज न वापरता कार्य करते. परिणामी, ती ग्रामीण भागातील गावांसाठी प्रभावी ठरू शकते. याव्यतिरिक्त, या प्रक्रियेतून निर्माण होणाऱ्या चिखलाचा वापर जैविक खत निर्मितीसाठी केला जाऊ शकतो.
*शाश्वत विकासासाठी मैलाचा दगड*
पाच दशकांपासून पर्यावरणीय तंत्रज्ञानाच्या क्षेत्रात कार्यरत असलेली जी-प्लेस कॉर्पोरेशन या प्रकल्पाच्या माध्यमातून भारतात विकेंद्रीकृत सांडपाणी व्यवस्थापन आणि सेंद्रिय शेतीला चालना देण्याचा मानस बाळगते. तज्ज्ञांच्या मते, हा करार भारतात पर्यावरण संरक्षण आणि शाश्वत विकासासाठी एक मैलाचा दगड ठरू शकतो.
प्रा.डाॅ. मंगेश कराड, कार्यकारी अध्यक्ष, एमआयटी एडीटी विद्यापीठ, पुणे – ही केवळ एक तांत्रिक भागीदारी नसून स्वच्छ व शाश्वत भविष्याच्या दिशेने टाकलेले महत्त्वाचे पाऊल आहे. आमच्या विद्यार्थ्यांना आता जागतिक दर्जाच्या तंत्रज्ञानावर काम करण्याची संधी मिळणार आहे.
दीपक कपाडिया, व्यवस्थापकीय संचालक, क्रिस एअरो – हा करार ‘इनोव्हेशन विथ इम्पॅक्ट’ या आमच्या दृष्टिकोनाचे प्रतिबिंब आहे. जी-प्लेस आणि एमआयटी एडीटीसह ही भागीदारी करताना आम्हाला आनंद होत आहे.
