पुणे : पुणे शहरातील मान्सूनपूर्व नाले, कल्व्हर्ट व जलनिस्सारण व्यवस्थेशी संबंधित विविध कामांच्या प्रगतीचा आढावा घेण्यासाठी मा. अतिरिक्त महापालिका आयुक्त (इस्टेट) श्री. प्रजित नायर यांच्या अध्यक्षतेखाली सर्व परिमंडळ उपायुक्त, क्षेत्रीय कार्यालयांचे सहाय्यक आयुक्त व संबंधित विभागांच्या अधिकाऱ्यांची आढावा बैठक आयोजित करण्यात आली.
बैठकीत शहरातील विविध भागांमध्ये सुरू असलेल्या नाले रुंदीकरण, खोलीकरण, गाळ काढणे, कल्व्हर्ट दुरुस्ती व बांधकाम, जलनिस्सारण व्यवस्थेची क्षमता वाढविणे तसेच पूरजन्य परिस्थिती टाळण्यासाठी हाती घेण्यात आलेल्या कामांचा सविस्तर आढावा घेण्यात आला. प्रत्येक परिमंडळनिहाय कामांची सद्यस्थिती, प्रलंबित बाबी, अडचणी आणि त्यावरील उपाययोजनांबाबत चर्चा करण्यात आली.
अतिरिक्त महापालिका आयुक्त (इस्टेट) श्री. प्रजित नायर यांनी सर्व संबंधित अधिकाऱ्यांना मान्सूनपूर्व नियोजित कामे वेळेत व दर्जेदार पद्धतीने पूर्ण करण्याच्या सूचना दिल्या. ज्या ठिकाणी कामांची गती अपेक्षेपेक्षा कमी आहे, तेथे आवश्यक मनुष्यबळ व यंत्रसामग्री उपलब्ध करून कामे तातडीने पूर्ण करण्याचे निर्देश देण्यात आले.
तसेच, पुढील आठवड्यापासून विविध क्षेत्रीय कार्यालयांच्या हद्दीतील नाले व कल्व्हर्ट कामांची प्रत्यक्ष स्थळपाहणी करण्यात येणार असून, सुरू असलेल्या कामांच्या गुणवत्तेची व प्रगतीची तपासणी करण्यात येणार असल्याचे मा. अतिरिक्त महापालिका आयुक्त (इस्टेट) श्री. प्रजित नायर यांनी सांगितले. प्रत्यक्ष पाहणीदरम्यान आढळून येणाऱ्या त्रुटी तात्काळ दूर करून नागरिकांना पावसाळ्यात कोणत्याही प्रकारचा त्रास होणार नाही, यासाठी सर्व विभागांनी समन्वयाने काम करावे, असे निर्देशही त्यांनी दिले.
पुणे महानगरपालिका शहरातील पूरस्थिती टाळणे, पावसाच्या पाण्याचा सुरळीत निचरा होणे आणि नागरिकांची सुरक्षितता सुनिश्चित करणे यासाठी विविध विभागांच्या माध्यमातून नियोजनबद्ध कामे राबवत असून, सर्व संबंधित यंत्रणांनी कामांच्या अंमलबजावणीत अधिक गती आणावी, असे आवाहन यावेळी करण्यात आले.
याप्रसंगी, परिमंडळ अधिकारी मा. उपायुक्त श्री. विजयकुमार थोरात, मा. उपायुक्त श्री. अरविंद माळी, मा. उपायुक्त श्री. माधव जगताप, मा. उपायुक्त श्री. अविनाश सकपाळ, मा. उपायुक्त श्रीमती आशा राऊत, मा.गणेश सोनुने आपत्ती व्यवस्थापन प्रमुख, क्षेत्रीय कार्यालयांचे सहाय्यक आयुक्त व संबंधित अधिकारी उपस्थित होते.
