नवी दिल्ली | प्रतिनिधी : प्रसिद्ध सामाजिक कार्यकर्ते सोनम वांगचुक यांनी केंद्रीय मंत्री जे. पी. नड्डा आणि डॉ. जितेंद्र सिंह यांच्यासोबत झालेल्या चर्चेनंतर आपले उपोषण मागे घेतले आहे. ते 28 जूनपासून सुरू असलेल्या सीजेपीच्या नेतृत्वाखालील आंदोलनाला पाठिंबा देण्यासाठी बेमुदत उपोषणावर होते.
सुमारे 26 दिवस सुरू असलेल्या या उपोषणादरम्यान विविध सामाजिक संघटना, विद्यार्थी आणि नागरिकांनी वांगचुक यांच्या आंदोलनाला पाठिंबा दर्शविला होता. केंद्रीय मंत्र्यांसोबत झालेल्या चर्चेनंतर सकारात्मक आश्वासने मिळाल्याचे सांगत त्यांनी उपोषण सोडण्याचा निर्णय घेतला.
उपोषण मागे घेत असताना सोनम वांगचुक यांनी आंदोलनातील प्रमुख मुद्द्यांवर सरकारने सकारात्मक भूमिका घ्यावी, अशी अपेक्षा व्यक्त केली. तसेच संबंधित प्रश्नांवर पुढील काळातही शांततापूर्ण आणि लोकशाही मार्गाने लढा सुरू राहील, असे त्यांनी स्पष्ट केले.
या निर्णयामुळे गेल्या अनेक दिवसांपासून सुरू असलेल्या आंदोलनाला महत्त्वाचे वळण मिळाले असून, आता सरकार पुढे कोणती ठोस पावले उचलते याकडे सर्वांचे लक्ष लागले आहे.
