औंध : औंध येथील द औंध सोशल फाउंडेशनच्या कार्यालयात ७९ वा स्वातंत्र्यदिन उत्साहात आणि देशभक्तीपूर्ण वातावरणात साजरा करण्यात आला. यावेळी राष्ट्रध्वजाचे ध्वजारोहण करून राष्ट्रध्वजास मानवंदना देण्यात आली. त्यानंतर राष्ट्रगीताने कार्यक्रमाची सुरुवात झाली.
ध्वजारोहणानंतर उपस्थित नागरिक व कार्यकर्त्यांशी संवाद साधण्यात आला. यावेळी औंध परिसरातील विविध सामाजिक व विकासात्मक विषयांवर सविस्तर चर्चा करण्यात आली. प्रशासकीय कामकाज अधिक लोकाभिमुख, पारदर्शक आणि प्रभावी करण्याच्या दृष्टीने नागरिकांच्या सूचना व अपेक्षा जाणून घेण्यात आल्या.
औंध परिसराच्या सर्वांगीण विकासासाठी नागरिक, सामाजिक संस्था आणि प्रशासन यांनी समन्वयाने काम करण्याची गरज यावेळी व्यक्त करण्यात आली. जनसेवेला प्राधान्य देत परिसरातील नागरिकांच्या समस्या सोडविण्यासाठी सातत्याने प्रयत्न करण्याचा निर्धारही व्यक्त करण्यात आला.
यावेळी सौ. भक्ती अजीत गायकवाड, नगरसेविका, पुणे मनपा, सदस्य, महिला व बालकल्याण समिती तथा उपाध्यक्षा, औंध सोशल फाउंडेशन आणि अभिजीत सुभाषदादा गायकवाड, अध्यक्ष, औंध सोशल फाउंडेशन यांच्यासह फाउंडेशनचे पदाधिकारी, कार्यकर्ते व नागरिक उपस्थित होते.
स्वातंत्र्यदिनाच्या निमित्ताने प्रशासकीय पारदर्शकता, लोकसहभाग आणि जनसेवेची बांधिलकी अधिक दृढ करण्याचा संदेश या कार्यक्रमातून देण्यात आला.
