मुंबई दि.११ (शशिकांत पाटोळे) : मुंबईतील मंत्रालयासमोर असलेल्या राज्याचे वनमंत्री गणेश नाईक यांच्या ‘पावनगड’ या शासकीय निवासस्थानी आज (११ नोव्हेंबर २०२६) सकाळी ११:४३ वाजण्याच्या सुमारास भीषण आग लागली. या घटनेची माहिती मिळताच मंत्रालय परिसर आणि प्रशासकीय यंत्रणेत एकच खळबळ उडाली होती.
प्राथमिक माहितीनुसार, बंगल्यातील एका खोलीत बसवलेल्या एअर कंडिशनर (AC) मशीनमध्ये तांत्रिक बिघाड होऊन शॉर्ट सर्किट झाले आणि त्यामुळे ही आग लागली.
आग लागताच काही वेळातच संपूर्ण परिसरात धुराचे प्रचंड लोट पसरले. यामुळे आजूबाजूला असलेल्या लोकांमध्ये काही काळ भीतीचे वातावरण निर्माण झाले होते.मुंबई महानगरपालिकेच्या अग्निशमन दलाने परिस्थितीचे गांभीर्य ओळखून या आगीला ‘लेव्हल-१’ (Level-I) ची आग घोषित केले होते.
घटनेची माहिती मिळताच मुंबई अग्निशमन दलाच्या गाड्या आणि जवान तातडीने घटनास्थळी दाखल झाले. जवानांनी वेगाने पाण्याचा मारा करत युद्धपातळीवर प्रयत्न सुरू केले. बंगल्याच्या अंतर्गत भागात धूर साचल्यामुळे सुरुवातीला काही अडचणी आल्या, मात्र जवानांच्या तत्परतेमुळे आग इतर खोल्यांमध्ये किंवा शेजारच्या इमारतींमध्ये पसरण्यापूर्वीच दुपारी १२ वाजून ४२ मिनिटांच्या सुमारास पूर्णपणे आटोक्यात आणण्यात यश आले.
सुदैवाने या दुर्घटनेत कोणतीही जीवितहानी झाली नसून कोणीही जखमी झालेले नाही. ज्यावेळी ही आग लागली, तेव्हा वनमंत्री गणेश नाईक हे या शासकीय निवासस्थानी उपस्थित नव्हते. बंगल्यात उपस्थित असलेल्या इतर कर्मचाऱ्यांना वेळीच सुखरूप आणि सुरक्षितस्थळी बाहेर काढण्यात आले. मात्र, या आगीत बंगल्यातील फर्निचर आणि इतर साहित्याचे मोठे नुकसान झाल्याचा अंदाज वर्तवला जात आहे.
सध्या अग्निशमन दलाकडून घटनास्थळी कुलिंग ऑपरेशन (परिस्थिती पूर्णपणे थंड करण्याचे काम) पूर्ण करण्यात आले असून पोलीस व संबंधित यंत्रणा आगीच्या कारणाची अधिकृत चौकशी करत आहेत.
