पुणे :खडकवासला विधानसभा मतदार संघातील जवळपास 27 मतदान केंद्रे मतदारांच्या सोयीच्या दृष्टीने स्थलांतरित करण्यात आली आहेत. यामध्ये मतदारांना सहज पोहोचता यावे, गर्दीची समस्या टाळावी, तसेच काही शाळांची इमारत जीर्ण झाल्यामुळे अशा विविध कारणांनी मतदान केंद्रांचे ठिकाण बदलले गेले आहे.
या बदलांमुळे काही केंद्रे 100 मीटर, काही 500 मीटर तर काही ठिकाणी 1.5 किलोमीटर अंतरावर स्थानांतरित झाली आहेत.
मतदारांना नवीन मतदान केंद्रांची माहिती वेळेवर मिळावी म्हणून जुन्या मतदान केंद्राच्या ठिकाणी नवीन केंद्राची माहिती असलेले फलक लावण्यात येणार आहेत. निवडणूक निर्णय अधिकारी डॉ. यशवंत माने, किरण सुरवसे, आणि सचिन आखाडे, अंकुश गुरव यांनी माहिती पत्रकाद्वारे ही घोषणा केली. यामुळे मतदारांना योग्य ठिकाणी जाऊन मतदानाचा हक्क बजावता येईल आणि कोणतीही गैरसोय होणार नाही, असा प्रशासनाचा विश्वास आहे.
