पुणे, दि. २३ डिसेंबर :पुणे महानगरपालिकेच्या सार्वत्रिक निवडणूक २०२५-२६ साठी निवडणूक प्रक्रियेला अधिकृत सुरुवात झाली असून ४१ प्रभागांमधून १६५ सदस्यांच्या निवडणुकीसाठी १५ निवडणूक निर्णय अधिकारी यांची कार्यालये स्थापन करण्यात आली आहेत. या कार्यालयांमार्फत आज पहिल्याच दिवशी एकूण २८८६ नामनिर्देशन फॉर्मची विक्री झाल्याची माहिती पुणे महानगरपालिकेच्या माहिती व जनसंपर्क कार्यालयाने दिली आहे.
नामनिर्देशन फॉर्मची सर्वाधिक विक्री कसबा विश्रामबागवाडा निवडणूक निर्णय अधिकारी कार्यालयात (३००) झाली असून सर्वात कमी विक्री कोंढवा येवलेवाडी कार्यालयात (५१) नोंदविण्यात आली आहे.
विविध निवडणूक निर्णय अधिकारी कार्यालयांमधील फॉर्म विक्रीचा तपशील पुढीलप्रमाणे आहे –
येरवडा-कळस-धानोरी (१९५), नगर रोड-वडगाव शेरी (१९५), कोथरूड-बावधन (१९४), औंध-बाणेर (७३), शिवाजीनगर-घोले रोड (२७५), कै. बा. स. ढोले पाटील रोड (१७५), हडपसर-मुंढवा (१९९), वानवडी-रामटेकडी (१९९), बिबवेवाडी (२२१), भवानी पेठ (१९१), वारजे-कर्वेनगर (२२१), सिंहगड रोड (१९७), धनकवडी-सहकारनगर (२००) आदी कार्यालयांचा समावेश आहे.
दरम्यान, आज कोणत्याही निवडणूक निर्णय अधिकारी कार्यालयात एकही नामनिर्देशन पत्र दाखल झालेले नाही, असेही स्पष्ट करण्यात आले आहे.
महानगरपालिका निवडणूक २०२५-२६ अनुषंगाने पुणे महानगरपालिका हद्दीत आदर्श आचारसंहिता प्रभावीपणे राबविण्यासाठी विविध पथकांची नियुक्ती करण्यात आली असून निवडणूक प्रक्रिया मुक्त, पारदर्शी व निर्भय वातावरणात पार पाडण्यासाठी प्रशासन सज्ज असल्याचे प्रशासनाकडून सांगण्यात आले आहे.
