पुणे : औंध येथील संजीवनी मेडिपॉईंट हॉस्पिटल परिसरातील तीन सहकारी गृहनिर्माण संस्थांनी रस्त्यावरील दिव्याचा खांब हलविल्यामुळे निर्माण झालेल्या सुरक्षेच्या धोक्याबाबत महानगरपालिकेकडे गंभीर तक्रार दाखल केली आहे. गीत गंगा, ऑर्किड आणि डिफेन्स सहकारी गृहनिर्माण संस्थांच्या वतीने हे निवेदन सादर करण्यात आले आहे.
रहिवाशांच्या म्हणण्यानुसार, संजीवनी मेडिपॉईंट हॉस्पिटललगतच्या लेनच्या सुरुवातीला असलेला रस्त्यावरील दिव्याचा खांब अलीकडेच हलविण्यात आला. हा बदल हॉस्पिटलच्या कोपऱ्यात पार्किंगसाठी जागा निर्माण करण्याच्या उद्देशाने करण्यात आल्याचा संशय व्यक्त करण्यात आला आहे. मात्र, या स्थलांतरामुळे संपूर्ण लेनमधील रस्त्यावरील दिवे गेल्या जवळपास आठवडाभरापासून बंद असून नागरिकांना अंधारात वावरावे लागत आहे.
विशेष म्हणजे, नव्याने बसविण्यात आलेला खांब इतर खांबांच्या सरळ रेषेत नसून तिरक्या आणि अनियमित पद्धतीने बसविण्यात आल्याचा आरोप करण्यात आला आहे. तसेच खांबाजवळ मोठी झाडे असल्याने भविष्यात दिवे सुरू झाले तरी प्रकाश व्यवस्थित पडणार नसल्याची भीती रहिवाशांनी व्यक्त केली आहे.
या बदलामुळे विद्युत जोडणी खासगी मालमत्तीतून किंवा तिच्या वरून न्यावी लागू शकते, असा मुद्दाही रहिवाशांनी उपस्थित केला आहे. यासाठी आवश्यक तांत्रिक आणि प्रशासकीय मान्यता घेण्यात आली होती का, असा सवाल त्यांनी उपस्थित केला आहे. खासगी जागेचा वापर, भविष्यातील देखभाल आणि सार्वजनिक सुरक्षेच्या दृष्टीने हा प्रकार गंभीर असल्याचे निवेदनात नमूद करण्यात आले आहे.
दरम्यान, खांब हलवल्यानंतर कोपऱ्याची जागा मोकळी झाल्याने त्या ठिकाणी वाहने पार्क होण्याची शक्यता वाढली आहे. त्यामुळे वळणावर “ब्लॅक स्पॉट” तयार होऊन विशेषतः रात्रीच्या वेळी अपघाताचा धोका वाढू शकतो, अशी भीती स्थानिकांनी व्यक्त केली आहे.
रहिवाशांनी महानगरपालिकेला तातडीने चौकशी करून संबंधित खांब पूर्वीच्या मूळ जागी पुन्हा बसवावा, बंद असलेले रस्त्यावरील दिवे त्वरित सुरू करावेत आणि त्या ठिकाणी अनधिकृत पार्किंग रोखण्यासाठी उपाययोजना कराव्यात, अशी मागणी केली आहे.
“ही केवळ दिव्याच्या खांबाची बाब नसून नागरिकांच्या सुरक्षेशी संबंधित गंभीर प्रश्न आहे. प्रशासनाने दुर्लक्ष न करता तातडीने हस्तक्षेप करावा,” अशी भूमिका तिन्ही संस्थांच्या पदाधिकाऱ्यांनी मांडली आहे.
