कोथरूड : कोथरूड मधील बळवंतपुरम साम्राज्य सोसायटी आणि म्हातोबा नगर यांच्या शेजारी असलेल्या सूर्यकांत काकडे फार्म या ठिकाणी असलेल्या मोकळ्या जागेवर सुनिधी चौहान लाईव्ह या कार्यक्रमाचं आयोजन करण्यात आलं आहे.कार्यक्रम होणार असलेली जागा / क्षेत्र ही रेड झोन या विभागामध्ये समाविष्ट आहे.
याचाच अर्थ सदर क्षेत्र हे केंद्र सरकारच्या संरक्षण विभागाच्या अखत्यारीत असून लष्करी कामांकरिता आरक्षित क्षेत्र आहे.
सुनिधी चौहान लाईव्ह या कार्यक्रमाचे आयोजन याच आरक्षित भूखंडावर कसे काय करण्यात आले आहे ? या कार्यक्रमाला पोलीस खात्याने कशाच्या आधारे परवानगी दिली आहे ? यासारखे अनेक प्रश्न या निमित्ताने उपस्थित होतात.
या कार्यक्रमाच्या आयोजनामुळे संपूर्ण परमहंस नगर परिसरामध्ये मोठ्या प्रमाणावर वाहतूक कोंडी चा प्रश्न निर्माण होऊ शकतो. तेथील नागरिकांना नाहक मनस्तापाला सामोरे जावे लागणार आहे त्यामुळे परिसरातील नागरिकांचा या कार्यक्रमाच्या आयोजनाला मोठा विरोध आहे. त्यामुळे बेकायदेशीरपणे आयोजित केलेल्या या कार्यक्रमाला पोलीसांनी कुठलीही परवानगी देऊ नये आणि दिली असेल तर ती रद्द करावी अशी मागणी मनसेने पत्राद्वारे केली आहे. सदर कार्यक्रम रद्द करावा अन्यथा नागरिकांच्या न्याय हक्कासाठी तीव्र आंदोलन छेडण्याचा इशारा देखील मनसेच्या वतीने देण्यात आला.
