मुंबई : महाराष्ट्र विधीमंडळाच्या पावसाळी अधिवेशनाच्या पार्श्वभूमीवर महाविकास आघाडीची महत्त्वपूर्ण बैठक आज पक्षप्रमुख Uddhav Thackeray यांच्या उपस्थितीत पार पडली. या बैठकीत आगामी अधिवेशनातील भूमिका, राज्यातील विविध प्रश्नांवर सरकारला घेरण्याची रणनीती तसेच महाविकास आघाडीतील समन्वय यावर सविस्तर चर्चा करण्यात आली.
बैठकीस शिवसेना (उद्धव बाळासाहेब ठाकरे) पक्षाचे नेते व खासदार Sanjay Raut, काँग्रेस प्रदेशाध्यक्ष Harshvardhan Sapkal, राष्ट्रवादी काँग्रेस (शरदचंद्र पवार) पक्षाचे प्रदेशाध्यक्ष Shashikant Shinde, विधानसभा गटनेते Bhaskar Jadhav, विधान परिषदेतील विरोधी पक्षनेते Ambadas Danve, आमदार Sunil Prabhu, काँग्रेस नेते Satej Patil यांच्यासह महाविकास आघाडीचे अनेक आमदार उपस्थित होते.
राज्यातील बदलत्या राजकीय घडामोडींमध्ये शिवसेना (उद्धव बाळासाहेब ठाकरे) पक्षाचे सहा खासदार सत्ताधारी शिवसेनेत गेल्यामुळे विरोधकांच्या ताकदीवर प्रश्नचिन्ह उपस्थित केले जात असले, तरी महाविकास आघाडीतील तीनही प्रमुख पक्षांचे नेतृत्व अद्याप एकत्र असल्याचे या बैठकीतून स्पष्ट झाले. विशेष म्हणजे, राजकीय आव्हानांच्या पार्श्वभूमीवरही आघाडीतील समन्वय कायम असल्याचा संदेश या बैठकीतून देण्यात आला.
राजकीय निरीक्षकांच्या मते, नेतृत्वातील ही एकजूट कार्यकर्त्यांमध्ये नवचैतन्य निर्माण करणारी ठरत असून शिवसेना (उद्धव बाळासाहेब ठाकरे), काँग्रेस आणि राष्ट्रवादी काँग्रेस (शरदचंद्र पवार) या तिन्ही पक्षांच्या कार्यकर्त्यांमधील आक्रमकता आणि उत्साह अद्याप कायम आहे. आगामी स्थानिक स्वराज्य संस्था निवडणुका, विधानसभा राजकारण आणि जनतेच्या प्रश्नांवर संयुक्तपणे भूमिका घेण्याच्या दृष्टीने ही एकी महत्त्वाची ठरणार आहे.
पावसाळी अधिवेशनात शेतकरी, बेरोजगारी, महागाई, पायाभूत सुविधा, कायदा-सुव्यवस्था आणि राज्यातील विकासकामांसह विविध जनहिताच्या मुद्द्यांवर सरकारला जाब विचारण्याची तयारी महाविकास आघाडीने सुरू केल्याचे संकेत या बैठकीतून मिळाले. त्यामुळे आगामी अधिवेशनात सत्ताधारी आणि विरोधकांमध्ये जोरदार राजकीय संघर्ष पाहायला मिळण्याची शक्यता व्यक्त केली जात आहे.
