पुणे :शिवजयंतीचे औचित्य साधून Eduतंत्र निर्मित शिवदिनदर्शिका प्रकाशन सोहळा संसदरत्न खासदार डॉ. अमोल कोल्हे यांच्या शुभहस्ते पार पडला. या अभिनव उपक्रमाचे त्यांनी भरभरून कौतुक केले आणि संपादकांची छोटीशी मुलाखत घेतली.
खासदार कोल्हे यांनी Eduतंत्र या डिजिटल शैक्षणिक मासिकाच्या मागील चार वर्षांच्या कार्याचा आढावा घेतला. जिल्हा परिषदेच्या प्राथमिक शिक्षकांनी राबविलेल्या या अनोख्या संकल्पनेची त्यांनी विशेष दखल घेतली. शिवदिनदर्शिका हा ऐतिहासिक अध्ययनाचा प्रभावी स्रोत ठरू शकतो, असे मत त्यांनी मांडले.
शिवदिनदर्शिकेची वैशिष्ट्ये:
ही दिनदर्शिका केवळ तिथी आणि महत्त्वाच्या तारखांची यादी नसून, शिवकालीन इतिहासाच्या सखोल अध्ययनासाठी उपयुक्त संदर्भ ग्रंथ ठरते. यात खालील घटक समाविष्ट आहेत:
शिवकालातील महत्त्वाचे दिनविशेष आणि सनावळ्या
शिवरायांची शस्त्रास्त्रे, चलन आणि स्वराज्यातील किल्ले
शिवकालीन महत्त्वाच्या व्यक्तींचे जन्मदिन आणि स्मृतिदिन
स्वराज्याचे शूरवीर शिलेदार आणि ऐतिहासिक प्रसंग
ही दिनदर्शिका अभ्यासकांसाठी तसेच विद्यार्थ्यांसाठी अत्यंत माहितीपूर्ण ठरेल. छत्रपती शिवाजी महाराजांचा पराक्रम आणि राज्यकारभार समजून घेण्यासाठी अशा उपक्रमांची नितांत गरज आहे, असे खासदार कोल्हे यांनी नमूद केले.
शैक्षणिक उपक्रमांचा गौरव
शिक्षकांनी राबविलेल्या या उपक्रमाचे कौतुक करताना हवेली तालुक्यातील शिक्षक राज्यभर प्रेरणादायी ठरतील, असा विश्वास खासदार कोल्हे यांनी व्यक्त केला. शिक्षकांनी केवळ पुस्तकी शिक्षण न देता इतिहास जिवंत ठेवण्याचे कार्य करावे, असेही त्यांनी सांगितले.
शिवकालीन घडामोडी आणि ऐतिहासिक घटना नव्या पिढीपर्यंत पोहोचविण्याच्या दृष्टिकोनातून शिवदिनदर्शिका एक महत्त्वाचा उपक्रम ठरणार आहे. महाराष्ट्राच्या गौरवशाली इतिहासाचा प्रसार करण्यासाठी अशा संकल्पना राबविणे ही काळाची गरज आहे, असे प्रतिपादन खासदार अमोल कोल्हे यांनी केले.
