पुणे : पीएमपीएमएलच्या आगार व्यवस्थापकाने महिला वाहकाशी अश्लील कृत्य केल्याचा धक्कादायक प्रकार उघडकीस आला आहे. याप्रकरणी आगार व्यवस्थापकाविरुद्ध समर्थ पोलीस ठाण्यात गुन्हा दाखल करण्यात आला आहे. दरम्यान, आपल्या तक्रारीची दखल न घेतल्याने महिलेने आगार व्यवस्थापकाच्या केबिनमध्ये जाऊन अंगावर रॉकेल ओतून घेऊन आत्महत्या करण्याचा प्रयत्न केला होता.
याप्रकरणी सुनील धोंडिबा भालेकर (वय ४४ ,रा. चऱ्होली), संजय कुसाळकर यांच्याविरुद्ध गुन्हा दाखल करण्यात आला आहे. महिला वाहकाने समर्थ पोलीस ठाण्यात फिर्याद दिली आहे.
या प्रकरणानंतर महिलेने आगार व्यवस्थापक संजय कुसाळकर याने त्रास दिल्याचा आरोप केला. त्याविरुद्ध महिलेने बंडगार्डन पोलीस ठाण्यात तक्रार अर्ज दिला होता. त्या अर्जाच्या चौकशीच्या अनुषंगाने तिला पोलीस ठाण्यात चौकशीसाठी बोलावले. यावेळी तिचे दोन मित्र तिच्यासोबत होते. चौकशी नंतर महिला मित्रांसोबत नाश्ता करण्यासाठी करण्यासाठी सोमवार पेठेतील एका उपाहारगृहात गेली. त्यावेळी भालेकर पुन्हा तिथे आला. त्याने महिलेला धमकावले. तसेच त्याने महिलेशी अश्लील वर्तन केले. कुसाळकर याच्याविरुद्ध तक्रार कशी केली अशी विचारणा करून त्याने तिला धमकावले. यानंतर महिलेने पुन्हा पोलिसांकडे तक्रार दिली. तसेच राज्य महिला आयोगाकडे देखील महिलेने याप्रकरणी तक्रार केली.
दरम्यान, कुसाळकर याने महिला वाहकाला निलंबित केले. पीएमपी प्रशासनाकडून आपल्या तक्रारीची दखल घेतली गेली नसल्याचा आरोप करत अंगावर रॉकेल ओतून तिने आत्महत्येचा प्रयत्न केला. मात्र महिलेला रोखल्याने अनर्थ टळला. त्यानंतर महिलेने भालेकर आणि कुसाळकर यांच्याविरुद्ध फिर्याद दिली. समर्थ पोलीस ठाण्यात दोघांविरुद्ध गुन्हा दाखल करण्यात आला आहे. पोलीस पुढील तपास करत आहेत.
पोलिसांनी दिलेल्या माहितीनुसार, फिर्यादी महिला पीएमपीत २०१८ पासून वाहक म्हणून कामास आहे. पीएमपीच्या पुणे स्टेशन आगारात ती नियुक्तीस होती. आगारात कामास असलेल्या सुनील भालेकर याने फिर्यादी महिलेला त्रास देण्यास सुरुवात केली. भालेकर महिलेचा पाठलाग केला. याबाबत महिलेने बंडगार्डन पोलीस ठाण्यात फिर्याद दिली. त्यानंतर भालेकर याने महिलेला तक्रार मागे घेण्यासाठी धमकावले. त्याने तिला शिवीगाळ करत मारहाण केली. पीएमपीएमएलकडून याप्रकरणाची खात्याअंतर्गत चौकशी झाली. भालेकर याची नरवीर तानाजीवाडी आगारात बदली करण्यात आली होती.
