मराठ्यांना आरक्षण देणारच -एकनाथ शिंदेंचा निर्धार; भाषण सोडून शिवरायांच्या पुढे नतमस्तक

मुंबई : शरीरात रक्ताचा एक थेंब असेपर्यंत मराठा समाजासाठी काम करणार, कोणत्याही समाजाचे आरक्षण काढून न घेता मराठा समाजाला आरक्षण देणार, असा निर्धार मुख्यमंत्री एकनाथ शिंदे यांनी आज आझाद मैदान येथे आयोजित दसरा मेळाव्यात केला. मी मराठा समाजाचा आहे, आयुष्यभर समाजासाठी राबलोय, मी शिवाजी महाराजांची शपथ घेऊन सांगतो की मराठा समाजाला आरक्षण देणार असं आश्वासन एकनाथ शिंदे यांनी दिलं.

राज्य सरकार मराठा समाजाला आरक्षण देण्यासाठी कटीबद्ध आहे, तरुणांनी टोकाचं पाऊल उचलू नये असं आवाहन त्यांनी केलं. एकनाथ शिंदे जे बोलतो ते करतोच असे सांगत त्यांनी राज्यातल्या प्रत्येक समाज घटकाला न्याय देणार असल्याची ग्वाही दिली.

मराठा समाजाला आरक्षण देताना कुणाच्याही वाट्याचं काढून घेणार नाही, मराठा समाजाला न्याय देणार असे सांगत एकनाथ शिंदे यांनी छत्रपती शिवाजी महाराजांना अभिवादन केले आणि शपथ घेतली. मराठा समाजाला आरक्षण देताना सर्वच समाज घटकाला न्याय कसा मिळेल हे पाहिले जाईल, मराठा समाजाला निश्चितच आरक्षण दिले जाईल असे एकनाथ शिंदे म्हणाले.

शिवरायांच्या पुतळ्यासमोर झुकून शब्द दिला
गेल्या काही दिवसांपासून राज्यात मराठा आरक्षणाता मुद्दा तापल्याचे दिसून येत आहे. जालन्यात मराठा आरक्षणासाठी आंदोलन करणाऱ्या मनोज जरांगे यांनी राज्य सरकारला 40 दिवसांची मुदत दिली होती. ती मुदत आज संपली आहे. त्याचवेळी शिवसेनेच्या दसऱ्या मेळाव्याच्या स्टेजवरूनच एकनाथ शिंदे यांनी मराठा आरक्षणावरून भाष्य केले. एकनाथ शिंदे हे भाषण सुरू असतानाच शिवरायांच्या पुतळ्यासमोर गेले आणि त्या ठिकाणी नतमस्तक झाले.

तुमची बँक देना नव्हती तर लेना बँक होती?
मुख्यमंत्री एकनाथ शिंदे यांनी आज दसरा मेळाव्याच्या भाषणामध्ये उद्धव ठाकरेंवर टीका केली. ते म्हणाले की, तुमच्यावर किती केसेस आहेत? किती लाठ्या खाल्ल्या ते सांगा. तुमची बँक देना नव्हती तर लेना बँक होती. बाळासाहेबचा वारसा सांगणाऱ्यांनी आपला चेहरा आरसामध्ये पाहावा. एकनाथ शिंदे मुख्यमंत्री झाला तरी काही बदल झाला का? काल मी कार्यकर्ता, आज आणि उद्या कार्यकर्ता म्हणून काम करणार आहे. हिंमत करून, सरकार आडवं करून मी तिकडून इकडे बसलोय. तुमच्यातील एक जण उद्या मुख्यमंत्री झाला पाहिजे असं माझं म्हणणं आहे. तमाम जनता माझ्यासोबत जोपर्यंत आहे तोपर्यंत मला पदाची कसलीही लालसा नाही. मी दावोसमध्ये जातो आणि मुंबईच्या नाल्यामध्ये उतरतो, गरीबांच्या वसतीमधील शौचालयाची पाहणीदेखील करतोय.

See also  जनकल्याणासाठी पुण्यात दोन्ही दादा एकत्र चंद्रकांत दादा म्हणाले, पण बाणेर मध्ये अजित पवार यांच्या गटाच्या बॅनर वर शरद पवारांचे फोटो