पुणे – राज्य सरकारच्या अंतरिम अर्थसंकल्पात अखिल भारतीय आयुर्विज्ञान संस्था (एम्स) उभारण्याची घोषणा करण्यात आलेली आहे. या घोषणेचे स्वागत असून, त्यामुळे ससून रूग्णालयावरील भार हलका होईल, अशी प्रतिक्रिया आमदार सिद्धार्थ शिरोळे यांनी व्यक्त केली आहे.
ससून सर्वोपचार रुग्णालयाच्या धर्तीवर औंध येथे ८०० बेड्सच्या क्षमतेचे सुपर स्पेशालिटी हॉस्पिटल उभारण्यात यावे, अशा मागणीचे निवेदन सुमारे दोन वर्षांपूर्वी उपमुख्य मंत्री देवेंद्र फडणवीस आणि उपमुख्य मंत्री अजित पवार यांच्याकडे आमदार शिरोळे यांनी केले होते. शहरातील वाढती लोकसंख्या विचारात घेऊन ससून हॉस्पिटलला अजून एक सक्षम पर्याय उपलब्ध व्हावा, असा या निवेदनातील मागणीमागे उद्देश होता. औंध येथे ८४ एकर जागा विनावापर पडून आहे. त्याजागी हॉस्पिटल व्हावे, अशी मागणी होती आणि त्याच जागी एम्स हॉस्पिटल होत आहे, ही बाब स्वागतार्ह आहे. नागपूर येथील एम्स हॉस्पिटलमध्ये ८३० बेड्सची सुविधा उपलब्ध आहे. त्याच धर्तीवर पुण्यातही एम्स हॉस्पिटल साकारणार आहे. ही सुविधा लवकरात लवकर उपलब्ध व्हावी, यासाठी पाठपुरावा करेन, असे आमदार शिरोळे यांनी प्रसिद्धी पत्रकात म्हटले आहे.
