पुणे : वैष्णवी हगवणेच्या हुंडाबळीच्या पार्श्वभूमीवर हुंडाबंदीसह लग्नातील अनिष्ट प्रथा बंद करण्यासाठी धायरी ग्रामस्थांनी एल्गार पुकारला आहे. धायरी येथे ग्रामस्थांच्या वतीने आयोजित करण्यात आलेल्या ग्रामसभेत. मराठा बहुजनसह, अठरापगड जातीचे ग्रामस्थ सहभागी झाले होते. सर्वांनी एकमताने हुंडा न देणे आणि हुंडा न घेणे असा ठराव मंजूर केला.
यावेळी लग्नातील अनेक चुकीच्या प्रथा बदलण्याचे ठरावही मंजूर करण्यात आले. हुंड्यावरून छळ होऊ द्यायचा नाही आणि सहनही करायचा नाही. हुंड्यावरून छळ होत असल्यास मुलीला सासरी पाठवायचे नाही. कमी खर्चात आणि कमी लोकांमध्ये लग्न पार पाडावीत,लग्न वेळेतच लावावीत, जावई मानपान, मामा मंडळींचे मानपान 4/8 दिवस अगोदर मानाने उरकून घ्यावेत,
एकाच दिवशी साखरपुडा, लग्न आणि अन्य विधी करावेत, मान्यवरांच्या नावांचा पुकारा करू नये,, मान्यवरांनी स्टेजवर गर्दी करण्याचे टाळावे. नेत्यांच्या मानपानात वेळ वाया घालवू नये, सत्कार करु नयेत/स्वीकारू नयेत,साखरपुड्याला कमी महिला आणि कमी पुरुषांनी औक्षण करावे, लग्नात नाहक खर्च करू नये, जेवणामध्ये मोजकेच पदार्थ असावेत, जास्त पदार्थ टाळावेत.
पारण्याच्या मिरवणुका आणि त्यामुळे होणारी गर्दी टाळावी.
आपल्यामुळे ट्रॅफिक जॅम होणार नाही याची काळजी घ्यावी. प्री व्हिडिओ शूटिंग आणि इव्हेंट मॅनेजमेंट मध्ये जाणार वेळ वाचवावा.
फोटोग्राफर आणि मेकअप आर्टिस्ट यांना समज देण्यात यावी,
लग्न ठरण्यापूर्वी एक वेळ पत्रिका नाहीं पाहिली तरी चालेल पण मुलांचे शारीरिक आरोग्य तपासणी करूनच लग्ने ठरवावीत.
लग्नात काय दिले, काय नाही याची चर्चा लग्नात करू नये. आदर्श विवाह घडवून आणणाऱ्या कुटुंबाचा त्याच्या घरी जावून सन्मान करण्यात यावा. या ठरावांचे फलक गावात लावण्यात यावेत, चुकीच्या प्रथा बंद करून मुलगा व मुलगी कसे सुखी राहतील याचा विचार करावा.
यावेळी महाराष्ट्र प्रदेश काँग्रेसचे सरचिटणीस श्रीरंग चव्हाण पाटील, पुणे शहर आम आदमी पक्षाचे शहराध्यक्ष धनंजय बेनकर, राष्ट्रवादी काँग्रेसचे प्रवक्ते राहुल पोकळे, राष्ट्रवादी काँग्रेसचे शहराध्यक्षा स्वाती पोकळे, श्री. काकासाहेब चव्हाण, राणोजी पोकळे, पंढरीनाथ पोकळे,महादेव पोकळे, सनी रायकर, अँड राजेश मिंडे, गुलाब पोकळे, नामदेव भुरूक, निलेश दमिष्ट, मिलिंद पोकळे, विजय लायगुडे, संदीप शेठ रायकर, बाप्पुसाहेब पोकळे, गायकवाड, सोनाली पोकळे, सचिन मनेरे व ग्रामस्थ मोठ्या प्रमाणावर उपस्थित होते.
